教仔 (3歲)

一直以來, 晢晢喺爸媽心目中都算係乖孩子, 雖然有點挑皮, 但尚算肯講道理, 亦算有耐性, 當佢想做/得到什麼時, 我哋要求佢『要等』『要有禮貌』, 或者話佢知『唔可以, 因為危險』, 晢晢大多數都好樂意聽從! 雖然未至於百分之一百聽教聽話, 尤其當晢晢唔舒服或扭眼瞓時總有點忟爭(呢個情況可以理解), 但總括而言, 晢晢都算是不錯…

不過呢個『不錯』唔知係因為『三歲效應』還是『妹妹症侯群』就而有了轉變… 雖然喺狀態良好時依然好正常及聽話, 但不在狀態時(尤以朝早起床及放學後最為嚴重!)的脾氣就變得愈來愈臭!!! 一言不合就肆無忌憚的大吵大鬧, 十萬九千個『NO NO NO!』, 換衫NO! 刷牙NO! 返學NO! 食飯NO!  連落公園玩都NO! 又會因d好小o既事而發脾氣(例如畀人按咗個lift制)!!! 媽媽對住佢真係既心痛又無奈… 雖然心裡時時都記掛住呢個寶貝仔, 但見到時, 又好似拎住個計時爆炸咁, 深怕隨時講錯一句說話, 做錯一個動作佢又發癲!!!

曾經跟婆婆同爸爸傾, 但佢哋都異口同聲話『呢個年紀係咁!』又認為『晢晢食過藥(感冒藥/消炎藥)所以情緒會變差』 … 媽媽覺得就算係, 都唔可以撓埋手等時間過就會變好! 而且媽媽覺得晢晢情況已經係慣性肆無忌憚亂發脾氣!!! 所以一定要好好處理, 否則只會變本加厲!!!

早前, 晢晢終於出現最嚴重的一次…

冬至那天, 爸爸收早, 一家人外出食飯後本打算陪爸爸配眼鏡, 其間經過文具店, 晢晢衝咗入去睇玩具(佢未必想買, 可能只係想睇下), 但因為時間唔早, 爸爸就催促晢晢離開, 好聲好氣下仍唔願意離開, 爸爸就用硬功捉晢晢走, 之後就嚟料…

晢晢喺商場不停發爛咋! 大喊, 典地… 最後終極直頭瞓喺地下! 大喊! 除鞋兼掟鞋!!! 簡直係對媽媽的EQ作最大挑戰!!! 媽媽可以做的就只有由得佢發, 待佢稍為冷靜再捉佢企埋牆問佢做乜要除鞋!!!??? 但佢只發悔氣話:『唔靚! 我唔著!』, 之後再掟多一次鞋!!! (媽媽不知死咗幾多細胞…)

怒火中燒的媽媽盡量按捺自己, 意圖用說教方法解決… 媽媽抱起冇著鞋o既晢晢(其實一抱起佢已經好似變返隻綿羊, 會好嗲咁攬實媽媽), 媽媽以為呢個狀態可以講到道理, 但原來只係假象!!! 不段講一句, 駁一句!!! 非常硬頸!!!

 

『發脾氣先乖架!』

『扭計先乖架!』

『曳先抵鍚架!』

『我唔要乖, 我要曳!』

不停口吟住呢幾句, 媽媽終忍唔住…『你再咁講媽咪放低你留你喺度架啦!』. 跟手放咗佢落地(於行人隧道內)… 晢晢見到媽媽遠去o既身影開始怕得大喊, 媽媽見佢仲知驚就畀多次機會佢…

一直行到返屋企, 爸爸媽媽開始唔啋佢, 晢晢都知『lai』嘢, 開始搵話題聊我哋:『吖, 呢隻碟好好睇過喎, 你想唔想睇呀?』… 沉默其間, 媽媽心裡不斷盤算該如何處理!? 要喺『讓佢明白自己過錯』與『不要破壞關係』之間取得平衡實在係一件非常困難o既事! 媽媽心裡不斷祈禱, 求天父賜我哋智慧處理呢個問題…

之後媽媽再一次意圖用溫柔o既說話向晢晢說教, 但仍不得要令, 之後… 一向EQ爆棚的爸爸都要爆了! 爸爸見晢晢唔肯認錯就將佢所有心愛的車車和巴施光年全都沒收! 這次晢晢可驚了, 喊得聲嘶力竭!! 待晢晢冷靜後, 媽媽再一次說教, 呢次晢晢終於肯認低威了…

因為爸爸從未試過咁嚴厲對待晢晢, 所以媽媽都怕晢晢會怕咗爸爸! 果然, 當媽媽要求晢晢向爸爸道歉時, 晢晢苦著臉對媽媽講:『唔好呀! 爸爸打功夫架!』(原來佢怕爸爸打佢)… 經媽媽多翻鼓勵下(及建議晢晢邀請爸爸一齊沖涼), 晢晢就脫光衣服, 拖著媽媽手走到爸爸身邊戰戰兢兢話:『Sorry爸爸… 可唔可以同我一齊沖涼呀?』… 不久, 浴室又傳來倆父子的笑聲…

到第二朝起床, 晢晢拎住個空o既玩具籃跟Ciki姐姐講…

晢晢:『睇吓, 我冇晒d玩具啦…』

Ciki 姐姐:『點解呀?』

晢晢:『因為我曳呀! 我而家好乖, 可唔可以畀返d玩具我呀?』

Ciki 姐姐:『你問爸爸啦!』

(不過爸爸決定要晢晢多守行為幾日…)

本來呢日一直都十分乖巧, 以為已經學乖咗, 可惜到臨瞓時, 晢晢再次因小事發脾氣!!!

事原晢晢堅持要獨自一人鎖上厠所門刷牙, 爸爸拒絕, 晢晢就再一次發爛!!! 結果爸爸怒不可遏, 跟晢晢一同鎖進廁所, 並大罵:『你喺度做緊乜嘢!!! 你知唔知你好曳呀!!!』, 晢晢嚇得非常害怕, 不停求救:『我要媽咪… 我要媽咪… 我要媽咪…』, 叫得媽媽心都痛埋…

等晢晢多喊一段時間, 媽媽就敲門叫爸爸示意將晢晢交畀媽媽, 媽媽當然不停說教, 呢次晢晢似乎明白了…

自此之後, 媽媽每天都不停催眠式的說教, 晚上的睡前故事更通通圍繞『要聽從父母的話』『發脾氣的壞處』『笑令人開心』等… 而爸爸都一改YES MAN作風, 要有好表現要合理才SAY YES! 沒收的玩具, 都要晢晢持續一段時間有好表現才會逐件釋放!

經過三個多星期『嚴密監控』, 晢晢終於回復正常, 脾氣少咗, 合作多咗, 即使狀態欠佳, 都冇過往咁火爆… 感恩~! 不過爸爸媽媽未敢鬆懈, 仍會繼續注意!

睇見晢晢行為一天比一天變差, 媽媽心情差點跌進谷底… 心, 係愛您, 但又怕您發脾氣而想逃避您(當然只係想吓, 跟本避無可避), 自己又不斷怪責自己唔識教您… 呢種心情, 實在好難受! 而且要每一刻都提醒十二分精神去注意您(及我們)的行為, 兼不斷壓抑自己情緒向您說教又說教(媽媽仲要照顧妹妹呢!), 真的感到十分吃力! 幸好, 呢次總算告一段落, 否則要媽媽每天都對住一個隨時發爛的小孩真的會激到七孔流血!!!