陶陶。食餅餅 (8M2W3D) – 27-06.11

話說陶陶上兩課PG吃茶點時都未懂自行將食物放入口中, 媽媽簡直打咗個突!!! 所以便立即買包嬰兒手指餅同陶陶做特訓!!! 結果…

 

結果… 陶陶一拎到片餅就大大啖… o趙o趙o趙… 咬咬咬…

原來… 是媽媽杞人憂天…

又原來… 陶陶會揀食物了…

又又原來… 食嘢果然是陶陶的強項…

虛驚一場~~~ 嘻嘻~~~

不促之客 (3Y6M) – 20.06.11

小事一樁, 但晢晢d對白實在好好笑, 好想記一下~~~

呢一晚係打3號風球前夕, 屋企突然出現一隻蛾, 因為晢晢一早已經知道蛾飛定咗就會一直定喺度唔郁, 所以佢就眼定定望實佢飛, 直到隻蛾飛到大門的鏡前企定定就放下戒心繼續玩車車…

誰不知玩咗都未夠一分鐘, 晢晢就大叫:『媽咪, 隻moth呢???』 媽媽便(扮)努力地揾咗一輪都唔見, 於是心血來潮整古一下晢晢…

媽媽: (形造氣氛中…)『晢晢, 媽咪揾到隻moth喇…』

晢晢: (係扮鎮定)『喺邊呀???』

媽媽: (望實佢個頭頂)…

晢晢: (警告媽媽)『你呀! 你好話我聽你係講笑呀吓!!!』(哈哈! 在逃避現實...)

媽媽:『我都冇講嘢…』

晢晢:『隻moth喺邊呀???』

媽媽:『喺你個頭上面呀!』

晢晢: (條頸梗咗唔敢郁)『咦!! 你好話我知你係講笑定講真???』(勁喎! 居然冇嚇到即時彈起!!)

媽媽:『嘻~~ 講笑~!』

晢晢:『哎吔! 你傻o既咩! 講笑!』(呢d嘢都講得笑o既咩!?.... 佢似乎想講埋呢句, 不過未識講)

之後媽媽一時話喺佢背脊, 一時喺佢pat pat, 每次晢晢都要脅媽媽答佢『講笑』佢先安樂, 好搞笑~!

無聊, 但笑到肚痛!!!

陶陶上PG – 第二課 (8M2W) - 25.06.11

陶陶好醒神啊~!

突然發現好耐冇同陶陶合照, 即刻補返~!

今堂一開始又係做前庭訓練活動, 陶陶直頭大膽到嚴唔夠刺激!! 要搖到好高(鞦韆), 拋到好高(彈床)先笑出聲!! 爛玩到暈!!!

到感觀房(黑房)時同上一堂一樣, 毫無懼色的四處探索, 只不過其間媽媽發現佢瀨濕咗褲仔, 所以要中途離場處理… 因為媽媽唔想錯失太多上課時間, 所以加快手腳同陶陶換片換衫, 結果搞到媽媽成頭大汗… (可惜換完返到去感觀時間已完結, 要到下一part了…)

到集體活動時間, 今堂其中一個親子遊戲是『升降機』, 即面對面的抱起BB 『UP & DOWN』, UP要高過自己個頭, DOWN開始係到腰間, 尾段要DOWN TO THE FLOOR… 嘩!!! 陶陶呢隻大舊飯, 媽媽抱咗幾下已經斷臂!!! 其間陶陶仲要興奮得濟, 喺媽媽腰間高少少位置出『較剪腳』!!! 媽媽曲住對手唔上唔落簡直攞我條命!!! 完結時媽媽攰到手都震埋呀陰公!!!

第二個遊戲係執波波, 姑娘將(波波池用的)波波散滿地上, 要BB執起並放到籃中, 訓練小朋友手眼協調及聽指令, 可惜陶陶只肯每隻手執起一個然後不停『亨亨』, 冇跟到指示做…

第三個遊戲係玩BUBBLE, 訓練BB追視及捉bubble, 陶陶第一次接觸, 表現很好奇, 好樂意去捉, 可惜佢只顧住捉隔離人哋媽咪的bubble, 當媽媽的冇到… 騷擾到人哋真係唔好意思…

到最後茶點時間, 陶陶又係唔識自行將餅乾條放入口!! 媽媽再一次大跌眼鏡!!! (乜食嘢唔係陶陶強項咩!??) 媽媽已買咗包嬰兒手指餅, 決心要短時間內訓練陶陶做到!!

到放學時間, 陶陶又是耗盡元氣的, 不需10秒就自行入睡, 媽媽就趁機嘆辣辣餸咯~~ (今堂消耗媽媽咁多體力, 唔補下點得~!?)

上PG好處就是易點發現BB的機會點繼而多加訓練, 陶陶要加油啊!!!