陶陶@協康(1) – 第一課 (8M1W) – 16.06.11

陶陶:『吓? 我咁細個就要返學架嗱?』

當年晢晢哥哥都係8個月大時安排上幼潛, 雖然每星期出城上堂好吃力, 但實在獲益良多! 所以多辛苦都值得!

現在到陶陶… 其實基本的幼兒訓練知識媽媽都是有把握的, 但始終覺得, 要每星期持續有導師提點才會有恆心一點~! 而且亦覺得當年哥哥有得上, 妹妹都要有先公平, 所以都決心要為妹妹報名~!

但問題來了, 幼潛最就近的上課地點只得TST, 顧得細嚟又顧唔到個大, 加上幼潛已轉咗抽籤制, 想報, 都唔一定報到…

後來從朋友得知有個叫『青蔥計劃』, 課程內容(看似)跟幼潛差不多, 報名是以先到先得形式(即只要肯早d去排就保證有得上啦~!), 而且上課地點更是大西北!!! 媽媽便立即致電詢問詳情, 了解後認為值得一試, 於是便派爸爸晨吉咁早去排隊~!

(小插曲是, 表格上明明寫明是『先到先得』, 但排爸爸前面的太太竟然一人交兩張表格, 而中心又竟然接受! 即變相打尖!!! 此舉令爸爸明明可以排到但慘變waiting list! 爸爸不忿跟中心理論, 結果安排上下一期, 咁爸爸條氣先順d~~ 過後表格便註明了『一人交一表』)

由3月中報名一直等足3個月, 終於到上課時間! 呢日早上晢晢學校有表演節目, 媽媽剛巧趕得及看完晢晢演出才帶陶陶出發上學去~~~

是日主要上課內容: 前庭訓練活動(BB鞦韆, 搖床, 彈床, 滑梯), 感觀訓練(黑房追視), 集體活動(搖動搖鈴, 收玩具, 彩虹傘, 2個BB一組互拉開對方絲巾『PEEKABU』) , 還有茶點時間(手指餅 + 用開口杯飲水)

所有活動陶陶都好勇於嘗試, 前庭訓練活動時更笑到停唔到口!!! 到感觀房時亦好樂於接觸不同物件, 對黑房內的『閃燈』表現好奇(沒有害怕), 集體活動亦表現興奮, 姑娘唱歌時更呱呱叫唱埋一份!! 整體表現不錯~! 唯獨茶點時間, 原來陶陶仍未識咬斷手指餅(只識含住直至佢融), 媽媽大跌眼鏡~!

短短一個鐘頭裡面, 媽媽跟陶陶全程投入地去玩, 媽媽係從未見過陶陶咁長時間地開懷大笑!! 喺果一刻媽媽先發現, 原來咁耐以來, 媽媽都未試過咁專注地陪陶陶去玩, 更發現, 原來我呢個女都幾『爛玩』(哈哈)~~~ 爛玩到連姑娘都問:『佢係咪咩都唔驚架?』... 其實媽媽都係啱啱先知…

落堂了, 耗盡元氣的陶陶一踏出中心門口就暈低咗~!

好期待下一堂的來臨~!