何謂『CHOK爆咀??』
呢晚放工一返到屋企, 就見到晢晢個咀瘀瘀黑黑, 衫上又有血跡
, 於是捉住晢晢問個究竟…
媽媽:『晢晢, 你個咀仲咩呀?』
此時Ciki緊張地搶答:『晢晢同Yoyo玩時整到架!』
正義的晢晢好man咁話:『唔關Yoyo事o既, 係我唔小心撞到啫!
』(果然一人做事一人當!)
之後因為問極晢晢同Ciki姐姐都了解唔到實情, 於是媽媽就打畀婆婆…
婆婆:『唏! 個傻仔! 拎住支結他演唱閃電王首歌, 興奮得滯就畀支結他撞成咁喇!』(原來係咁… 仔… 你都得架喇…)
晢晢見媽媽咁緊張, 就七情上面地問: 『我… 我係唔係好嚴重呀?
』(淚眼凝眶)
媽媽(心諗: 咪扮嘢啦):『冇事~ 你下次唱歌唔好再拎住支結他係咁CHOK就冇事架喇…』
晢晢:『咩呀?
』(通常衰咗就會扮傻問『咩呀』…)
因為個血泡喺唇內, 都搽唔到d咩, 於是同佢碌雞蛋, 點知個衰仔(又玩嘢)係咁咬實隻蛋唔放! 
到第二日, 個血泡都不知不覺間穿咗, 之後好快已經散瘀, 好返晒~! 
當晚本來媽媽都頗擔心, 但當知道實情, 加上一連串生鬼對答… 結果… 笑餐飽…
呢個仔真係… 詼諧到爆… 
沒有留言:
張貼留言