激活開放日 14.11.09

呢日係Yoyo表姐學校開放日, 媽媽相約咗兩位姨媽同婆婆就齊齊嚟參觀咯~!  

媽媽大概用咗15分鐘排隊交報名表, 其間見到排前有位同樣報K1的小朋友, 或者佢係大B關係, 說話口齒伶俐, 跟晢晢B相比真係簡直超班~! 真擔心晢晢12月頭interview時被比下去… (媽媽好後悔當初放棄咗N1 offer啊…)

晢晢喺度望咩呢…?

咪係搵緊Yoyo表姐張相lor~!

今次開放日搞得唔錯, 有好多攤位遊戲玩, 當媽媽睇教科書時又有老師主動講解~! 環境雖然都偏舊, 但勝在夠大, 設備尚算齊全, 媽媽開始對呢間學校改觀~!

晢晢遠距離見到有哥哥姐姐玩呼拉圈又話要:「去果邊玩玩呀」…

晢晢:「但係點玩o既呢?」

晢晢觀察咗一陣, 見d哥哥姐姐放喺腰, 轉幾轉, 然後圈圈跌落地, 佢就跟人哋咁做, 又係放喺腰, 但冇轉！ 就咁放喺腰間幾秒就放手跌個圈圈落地~! (仔, 個重點係轉你就偏偏走去skip咗… 完全get錯晒~!)

之後婆婆出手教晢晢垂直放呼拉圈喺地上轉, 呢次終於一教就曉~! 晢晢懂得先正手拎個呼拉圈, 然後一扭個手腕成反手, 再放手由得個呼拉圈喺地上轉, 吾~~ 做得好好, 咁就叻叻喇~!

晢晢:「放喺哋下轉, 呢個我曉~!」

到上二樓行喇~! 是日有個課室佈置到好似DISCO 咁, 熄晒燈, 有彩燈喺牆上轉吓轉吓, 又播住節拍頗強勁o既音樂, 媽媽以為晢晢會好鍾意, 點知晢晢驚到即刻衝出課室, 媽媽唔想晢晢咁易放棄, 就捉返佢入去, 又唔畀佢走, 結果佢全程黐到媽媽實, 不停講「好驚呀… 好驚呀…」, 為免嚇怕佢, 都係唔好迫佢… 住喇~! (又要加緊訓練喇! 喺屋企搞個迷幼小P先得~!)

之後我哋就去玩波波池~! (係呀, 學校連波波池都有~! 勁呢!)

晢晢一見到就大叫:「波波池呀~!」仲嚷著要除鞋跳入去~!

晢晢:「大家見唔見到Yoyo表姐呀?? 」

晢晢: 『OH NO!! Yoyo喺個波波池「浸親」呀!! 救命呀!!!』

有位老師認得Yoyo, 一直都睇住Yoyo玩波波池, 但轉個頭就唔見咗Yoyo, 就問我哋「Yoyo呢?」媽媽就指一指Yoyo被「淹沒」o既位置, 老師即刻伸手潛入「水底」撈返Yoyo上嚟~~~ 個個都笑到肚痛~~ 哈哈~!

呢日我哋仲喺學校遇到隔離屋嗰嵐嵐妹妹, 佢一見到晢晢就話:「去哥哥度踩單車呀!」(真羨慕, 20個月就有咁強o既語言能力~!), 媽媽以為嵐嵐妹妹都會報呢間N1, 但嵐嵐媽話佢唔考慮畀囡囡咁早入學wor…

我哋玩咗大概個幾鐘就離開~~ 臨走時晢晢都不忙同周圍人/物say bye bye「 chair bye bye… shoe shoe bye bye… 姨姨bye bye… school bye bye… 玩玩 bye bye...」 成個親善大使~! 仔, 希望你喺interview果日都咁「親善」就好咯~!