媽媽:「晢晢, 你今日好曳呀!」晢晢:「媽媽, 唔好嬲啦~ 最多請你食糖啦~!」
今堂係第二堂, 唔知咩原因, 晢晢扭計程度比上一堂更甚, 搞到媽媽有d不知如何是好
…
比較投入係唱歌仔時段… 到故事時間, 唔知婷姨姨係咪睇過媽媽個卜, 今堂真係講有關主耶穌o既故事, 可惜晢晢唔識欣賞, 扭計程度最為嚴重…先係離座, 繼而瞓地, lur食candy, 要「藹瞓」, 去街街… 奇招層出不窮!!! 
個個都坐定定, 唯獨晢晢瞓地!!! 
到婷姨姨介紹圖功時間, 晢晢繼續不受控制, 直頭走到門口要求「去街街」, 媽媽都唔知點做!? 只好默默地(密密地)捉馬騮… 當婷姨姨要求小朋友舉手後就可以造圖功, 人人都依指示做, 唯獨晢晢堅持唔舉手就立即離座… 婷姨姨當然唔畀, 結果人人都順利地去造圖功, 晢晢就好似罰留堂般獨個兒對住婷姨姨, 要聽完婷姨姨唱完一整首歌先可以行動…
訓話中… 唔係, 婷姨姨唱緊歌仔啫… 
一額汗下完成圖功, 有驚無險…
好不容易完成圖功, 就洗手食預備茶點…
祈禱做得唔錯吧… 好戲在後頭…
「婷姨姨食茶點, 小欣姐姐食茶點, 各位小朋友食茶點」
… 幸好晢晢都好乖坐定定跟住講, 要求飲水時又會舉手講「謝謝」… 不過當婷姨姨講:「今日茶點係食香蕉同提子包」… 媽媽已忍唔住講:「大鑊… 全部都唔食…」(香蕉本來係晢晢最愛, 可惜幾個月前已經食厭咗!)… 不過問題都不在於此…
當晢晢食緊香蕉時(細細啖, 因為唔係幾想食~!), 爸爸突然多口指住晢晢件衫話:「晢晢, THOMAS呀!」, 晢晢聽到THOMAS 就「怱起條筋」離座到後面書架意圖拎THOMAS書! 媽媽當然阻止, 然後…「笑料」嚟喇… (苦笑)
媽媽本來想抱晢晢返回座位, 點知晢晢放軟個身, 加上媽媽甩手, 晢晢個後尾枕就撞咗落地(第一嘢!
), 然後媽媽諗住抱起晢晢安撫, 點知媽媽又唔小心「發」咗晢晢個額頭到隔離位同學張凳度(第二嘢!), 之後媽媽再雞手鴨腳地抱起晢晢交畀爸爸抱, 點知又唔小心將晢晢個頭殼頂撞到掛起爸爸心口o既相機(第三嘢, 呢嘢最應!!!)… 晢晢大喊了… Anna媽形容好似Mr. Bean的橋段... 媽媽跟著大笑, 但其實媽媽心裡都想喊埋一份…
好不容易氹掂晢晢, 又要「捱」提子包一役… 當然又係唔食, 仲搞到佢發忟爭… 好啦好啦! 掉咗佢啦! 媽媽都就快要爆咁制喇!
終於收拾好餐具, 然後… 仲未放得學… 今堂有「戶外活動」, 就係帶小朋友到郵局親自寄出上堂造的聖誕咭~! 呢個係一個好好o既體驗, 媽媽盡力按住自己o既不快, 跟晢晢投入活動~!
晢晢好心急, 未等得切婷姨姨影相就投入咗郵箱, 好在有後備道具~!
完成後, 晢晢就開始扭眼瞓, 心情欠佳, 本來約好Anna一家到CHARLIE BROWN CAFÉ 食lunch, 但媽媽擔心晢晢扭計煩到人, 所以都爽約了… 真係唔好意思…
經過呢堂, 媽媽心情真係差到極點, 以往乖巧o既晢晢去咗邊!? 點解一下子會變得咁失控!? 媽媽應該點做!? (下回分解)
沒有留言:
張貼留言