晢晢有趣語錄 – 24 個月

終於講到mini-bus, shuttle-bus 同 school-bus喇! 唔再係「year bus, mini」, 「year bus, shuttle」 

對魚魚的名字已十分熟識: 「Alligator, 扁扁, 懵懵, 黑魔利, 金魔利, 銀魔利, 米奇魚魚, 雞泡魚, moon仔, BB魚, snake…」每日叫唔停!  

晢晢非常眼利, 經常第一個發現C魚:「呀… 魚魚死咗呀, 好慘呀, 嗚嗚嗚(手放在雙眼下作狀喊), 撈丫~撈丫!」媽媽:「唔撈住啦, 等爸爸返嚟先撈啦!」晢晢:「唔啦! 媽咪撈啦!」(平時晢晢多數叫我媽媽, 但唔知點解每次要我撈魚都稱呼我做媽咪!?)  

有日晢無啦啦搬起張木凳仔唔知想去邊, 爸爸就問:「晢晢, 你搬張凳做咩呀?」晢晢:「我睇魚魚呀!」(原來擔凳仔坐喺魚缸前睇魚魚~ 真識嘆~!) 

開始會扭抱, 行行下會攔途截劫, 攬實爸爸/媽媽雙腿叫「抱抱丫!」, 每次我哋都會問佢點解, 初初佢會話:「好驚呀~ 好驚呀!」爸爸就問:「你驚咩呀!?」晢晢:「好驚呀!」爸爸:「你唔係驚呀! 攰呀嘛!」晢晢就會話:「好攰呀! 好攰呀!」… 不過有時, 晢晢都會冇耐性答我哋點解, 試過「噲!」一聲就掉頭跑咗去! (幾惡呀! 厭我哋煩呀!) 

做冬日, 我哋幾家人齊齊返到婆婆家做節, Yoyo表姐帶埋佢架單車仔到來, 晢晢見到就想坐, 之後… 當然唔夠表姐爭, 就嚎哭起上嚟, 媽媽抱起晢晢同佢講:「架單車係Yoyo架!」… 晢晢當堂收晒眼淚, 話:「吓, Yoyo既咩!?」之後就冇再扭計落去, 超好笑! 仔, 乜你咁明白事理o既咩!? 

某一晚, 晢晢要求媽媽拎THOMAS車仔畀佢, 媽媽要求SAY THANK YOU, 古惑的晢晢喺度玩嘢:「Thank you… YOYO」媽媽:「吓! 你THANK YOU 邊個??」然後晢晢又忍唔住笑話:「THANK YOU… 婆婆!」媽媽:「吓! 又玩嘢!?」… 如是者THANK YOU晒所有屋企人, 笑到佢冇氣先「THANK YOU 媽媽~!」 

近來晢晢好鐘意照鏡, 有時著咗爸爸/媽媽o既鞋, 或者穿起新衫就會邊走到鏡前邊講「照鏡先~ 照鏡先~」然後會話:「好靚呀」或者「好有型呀!」 

晢晢開始多用佢o既嗅覺, cream, 食物, 飲品, 剛洗完o既衫(充滿潔衣液味)… 甚至書中物品等等都會閒一餐, 然後就話:「好香呀~!」

相信返學後o既晢晢會講o既嘢會更多~! 加油!