點解一定要打機?

純粹有感而發…

星期日晚跟娘家出外晚膳, 菜仲未上, Yoyo媽就畀咗部NDS畀Yoyo表姐玩, 晢晢見到, 當然想玩埋一份, 媽媽唔畀(當然連Yoyo都唔畀), 晢晢就慘叫… 當時有家人催促媽媽開部I-PHONE既GAME打發晢晢, 但媽媽依然堅持, 晢晢繼續慘叫… 之後某人開聲教訓晢晢:「晢晢, 你唔准再扭計, 部NDS係Yoyo既, 你唔應該扭計攞人哋D嘢!」媽媽就應咗對方一句:「係唔應該畀Yoyo打機至真!」… 最後媽媽開咗I-PHONE裡面o既相畀晢晢睇, 睇咗一陣就收埋, 晢晢就冇再慘叫, 亦冇再扭計要打機!

人人教小朋友方法唔同, 但媽媽就係有呢份堅持! 點解一定要打機!? 要消磨佢哋時間仲有好多嘢可以做, 可以畀支筆佢畫下墊枱紙, 可以玩下泥膠(晢晢偏食唯一好處, 就係佢一定唔會放泥膠入口!), 可以畀幾支牙籤佢砌下圖案, 可以畀d小食佢舀下, 可以教佢用筷子夾嘢, 可以抱佢去睇魚魚(酒樓的魚缸), 甚至可以畀部平價相機畀佢自己影下相… 點解一定要佢哋雙眼發呆對住部NDS!?

曾經睇過一本書, 作者提到教小朋友, 有D方法係可以收到短期效果, 但就會有好長遠o既反效果(例如打罵, 短期可以制止某些壞行為, 但長期而言, 小朋友會學到用打人解決問題, 用打人發洩情緒等), 反之亦然! 媽媽堅持唔畀晢晢打機都係基於同一道理! 媽媽令願而家辛苦D, 由得晢晢慘叫多幾聲, 都唔想影響到佢將來! (或許將來未必如媽媽所願, 但至少呢一刻媽媽想盡力做到最好!)

或者等晢晢再大一點, 有自制能力時, 媽媽可能或者may be…會畀晢晢喺假期時接觸一下遊戲機(如果晢晢要求的話), 但現在就 SORRY~ NO WAY! 希望晢晢大個明白媽媽苦心!